२१ असोज, काठमाडौं । दशैंलगायत चाडपर्वमा नयाँ नोट साट्न सहज होस् भन्ने उद्देश्यले नेपाल राष्ट्र बैंकले बैंक तथा वित्तीय संस्थालाई एटिएम मेसिनबाटै १०० रुपैयाँका नयाँ नोट उपलब्ध गराउन निर्देशन दिएको छ।
राष्ट्र बैंकको निर्देशनसँगै केही बैंक तथा वित्तीय संस्थाले नयाँ प्रविधियुक्त एटिएम मेसिनबाट १०० रुपैयाँका नोट वितरण गर्न थालेका छन्।
नेपाल राष्ट्र बैंकका प्रवक्ता गुरुप्रसाद पौडेलले भोटेकोशी बाढीबाट ठूलो जनधनको क्षति भएको अवस्थामा नयाँ नोटबारे अनावश्यक प्रचारप्रसार नगरी चाडपर्वमा सुकिला तथा सफा नोट उपलब्ध गराउने व्यवस्था मिलाइएको बताए।
“एकातर्फ पैसा सटही गर्ने काम दैनिक गर्नुपर्ने नियमित कामजस्तै हो। यसलाई सूचना नै निकालेर गरिरहनुपर्छ भन्ने छैन,” उनले भने। उनका अनुसार यही असोज १ गतेदेखि राष्ट्र बैंकको थापाथलीस्थित कार्यालय, प्रादेशिक कार्यालय तथा वाणिज्य बैंकहरूबाट सुकिला र सफा नोट वितरण भइरहेको छ।
प्रवक्ता पौडेलले पछिल्ला चार–पाँच वर्षदेखि चाडपर्व लक्षित नयाँ नोट बजारमा ल्याउने परिपाटीलाई क्रमशः न्यूनीकरण गर्ने प्रयास भइरहेको पनि बताए।
उनका अनुसार गत भदौ ३१ गतेसम्म बजारमा ७ खर्ब ९४ अर्ब रुपैयाँ बराबरको मुद्रा चलनचल्तीमा रहेको थियो। दसैँका बेला उक्त रकममा करिब ८ देखि १० प्रतिशतसम्म वृद्धि हुने अनुमान गरिएको छ।
